21 снежня 2022 года ў Вялікай канферэнц-зале Прэзідыума Нацыянальнай акадэміі навук Беларусі адбылася ўрачыстая цырымонія ўзнагароджання пераможцаў рэспубліканскага конкурсу творчых работ, прысвечаных Году гістарычнай памяці

Конкурс быў аб’яўлены Нацыянальнай акадэміяй навук Беларусі.

Ён праводзіўся з мэтай папулярызацыі гістарычных ведаў і дасягненняў сучаснай беларускай дзяржавы, фарміравання пачуцця гонару за гераічнае мінулае беларускага народа і ўсведамлення вялікіх здабыткаў незалежнай Рэспублікі Беларусь, кансалідацыі грамадства і ўмацавання нацыянальнай ідэнтычнасці, стымулявання творчай дзейнасці ў галiне мастацтва, літаратурнай творчасці, падтрымкі таленавітых вынаходніцтваў у гуманітарнай сферы, а таксама папулярызацыі беларускай культуры на міжнароднай арэне.

У конкурсе прынялі ўдзел каля тысячычалавек рознага ўзросту і прафесій з усёй Беларусі. Конкурс праводзіўся ў сямі намінацыях.

Работы пяці членаў народнага літаратурнага аб’яднання «Роднае слова» былі адзначаны дыпломамі за выдатныя дасягненні ў конкурсе і памятнымі падарункамі.

У намінацыі «Знакамітыя асобы беларускай зямлі» Гран-пры атрымала член Саюза пісьменнікаў Беларусі Наталля Ніканчук. Яе нарыс «І было слова…», прысвечаны жыццю і творчасці члена Саюза пісьменнікаў Беларусі Ніны Кавалёвай, жанчыны, якая стала інвалідам у 28 год. Амаль палову жыцця яна была поўнасцю нерухомай, нават не магла трымаць аловак у руках. Нягледзячы на гэта, працягвала пісаць і выдаваць кнігі (усяго выйшла ў свет 25 зборнікаў), актыўна займалася грамадскай дзейнасцю. Ніне Дзмітрыеўне было прысвоена ганаровае званне «Чалавек года Горацкага раёна-2018» у намінацыі «Грамадска-палітычная дзейнасць», таксама яна лаўрэат рэспубліканскага конкурсу «Жанчына года-2019», пераможца шматлікіх літаратурных і песенных конкурсаў.

У гэтай жа намінацыі дыпломам III ступені адзначана настаўніца ДУА «Добраўская сярэдняя школа Горацкага раёна» Ларыса Іванова за твор, прысвечаны знакамітаму беларускаму пісьменніку, нашаму земляку Максіму Гарэцкаму. 

У намінацыі «Культура і побыт беларускага народа» дыпломам I ступені ўзнагароджана ветэран педагагічнай працы Людміла Дзёменская. Яе апавяданне «Жыла-была вёска» закранае тэму знікнення маленькіх паселішчаў Беларусі. Вёскі адыходзяць у нябыт, а разам з імі і звычаі, абрады беларускага народа. У творы паказана незвычайнае святкаванне абрада «Купалле».

У намінацыі «Вялікая Айчынная вайна ў памяці маёй сям’і» дыпломам II ступені ўзнагароджана ветэран працы Любоў Валчкова. Аснову конкурснай работы склалі ўспаміны яе бацькі Елізара Максімавіча Мяжэннага і маці Марыі Данілаўны, сясцёр Ульяны і Марыі, а таксама дакументы, якія пацвярджаюць удзел яе бацькі ў Вялікай Айчыннай вайне.

У намінацыі «Песні нашай Радзімы» дыплом I ступені атрымала знакамітая горацкая спявачка Надзея Курбасава. Яна ўдзельнічала ў конкурсе з песнямі «Рабіна», «Вернасць» і «Горкі-Горы». Музыку да гэтых твораў напісала наша зямлячка, кампазітар Валянціна Макеева. Аўтарамі слоў з’яўляюцца Уладзімір Карызна, Ніна Кавалёва і Святлана Цярэшка. Журы быў прадстаўлены таксама відэазапіс песні «Калина красная».

Людміла ДЗЕРУЖКОВА,
кіраўнік народнага аматарскага аб’яднання «Роднае слова»