Гэта быў сёмы год пасля таго, як воіны-вызваліцелі выгналі захопнікаў з Горацкай зямлі. Для жыхароў раёна ён стаў перыядам упартай працы па адбудоўванню разбуранага і аднаўленню народнай гаспадаркі

Своеасаблівы вынік мірнага сямігоддзя падведзены ў газетным матэрыяле «Лічбы аднаўлення і росту», надрукаваным у № 54 за 5 ліпеня.

● Добрыя паказчыкі ўжо мела аграрная галіна. Калгасы асвоілі пасяўныя плошчы на 104,8% у параўнанні з 1940 годам, у тым ліку па ільну – на 101,5%, па бульбе – на 104%. Колькасць буйной рагатай жывёлы павялічылася на 50,9%, авечак – на 23,5%, свіней – на 20,9%, птушкі –
на 70,1%.

● Сельская гаспадарка была лепш аснашчана навейшай тэхнікай, чым у даваенныя гады. Адноўлена дзейнасць трох МТС, створана чацвёртая – Горская. Да вайны ў раёне не было самаходных камбайнаў. У 1951 годзе на палетках працавала 29 такіх агрэгатаў.

● Ужо ў 1950 годзе прадпрыемствы дзяржаўнай, мясцовай прамысловасці і прамкааперацыі выпусцілі прадукцыі ў тры разы больш, чым у першым пасляваенным.

● У 1951 годзе была поўнасцю адноўлена даваенная школьная сетка. З 1944 года ўзведзена 14 школьных аб’ектаў, у тым ліку 6 – для 7-гадовых школ. Закончана будаўніцтва 2-павярховага памяшкання для рускай сярэдняй школы ў горадзе. Тут былі фізічны і хімічны кабінеты, наглядныя дапаможнікі, бібліятэка. У раёне ажыццяўлялася ўсеагульнае 7-гадовае навучанне.

● У БСГА быў адкрыты яшчэ адзін новы факультэт – эканомікі сельскай гаспадаркі. Да гэтага з’явіліся факультэты механізацыі і меліярацыі.

● Значны крок наперад зрабіла і горацкая медыцына. Была адноўлена сетка бальніц і лячэбных пунктаў у горадзе і сельскай мясцовасці.

● 2 верасня газета паведаміла аб тым, што БСГА значна пашырыла прыём студэнтаў: на 200 чалавек больш, чым у 1950 годзе. Асабліва запатрабаванымі аказаліся  агранамічны і землеўпарадкавальны факультэты. «Прыёмныя экзамены  паказалі, што паступаючыя на вучобу ў гэтым годзе маюць больш сталыя веды, чым у папярэднія гады», – заявіў прарэктар па вучэбнай рабоце С. С. Захараў. Дарэчы, кафедры папоўніліся новым абсталяваннем, лепш за іншыя былі асна­шчаны ім факультэты гідрамеліярацыі і механізацыі сельскай гаспадаркі.

● На гадавых курсах пры сельскагаспадарчай акадэміі павышалі кваліфікацыю больш
100 спецыялістаў сельскай гаспадаркі.

● Калектыў прамкамбіната райспажыўсаюза за 9 з палавінай месяцаў выканаў гадавы план па выпуску прадукцыі на 104,7%. Асаб­лівых поспехаў дабіліся рабочыя каўбаснага цэха. Яны вырабілі смачнай прадукцыі звыш гадавога плана на 72,9 тыс. руб.

● У калгасе імя Чкалава Паршынскага сельсавета быў набыты і ўстаноўлены лакамабіль магутнасцю
25 конскіх сіл. Яго  планавалася скарыстоўваць для работы піларамы і млына.

● Раённая кантора сувязі намеціла радыёфікаваць два калгасы, а ў калгасе «Перамога» абсталяваць свой радыёвузел.

● У верасні прайшоў агляд сельскай мастацкай самадзейнасці. Тры лепшыя калектывы і шэсць індывідуальных выканаўцаў  атрымалі граматы раённага аддзела культасветустаноў. Восем калектываў былі адаб­раны на абласны агляд.

● Газета ўзнімала і вост­рыя пытанні паўсядзённага жыцця насельніцтва. Так, у № 57 за 15 ліпеня ў заметцы «Калі будзе арганізаваны продаж малочнай прадукцыі?» у парадку крытыкі паведамлялася, што раймаслапрам не арганізаваў выраб кефіру і іншай «малочкі», а ў магазінах і прадпрыемствах грамадскага харчавання няма ў продажы малака.

Падрыхтавала Тамара ДРАЗДОЎСКАЯ