Нумар раённай газеты «Ленінскі шлях» за 9 мая другога пасляваеннага года змяшчаў шмат інфармацыі аб працоўных дасягненнях  жыхароў Горацкага краю. З вялікім жаданнем яны займаліся стваральнай дзейнасцю: адбудоўвалі разбураную гаспадарку, клапаціліся пра ўраджай

На старонках газеты некалькі паведамленняў аб ходзе веснавой сяўбы. На першай – інфармацыя аб тым, што першынство ў сацыялістычным спаборніцтве ўтрымлівае калгас імя Кірава Рэкцянскага сельсавета, якім кіруе Ларковіч. Напярэдадні Дня Перамогі гаспадарка поўнасцю закончыла сяўбу збожжавых і прыступіла да пасадкі бульбы.

На другой старонцы старшыня гэтага сельсавета П. Кошкін расказаў пра работу ўсіх гаспадарак, адзначыў пры гэтым, што «паўсямесна быў устаноўлен распарадак рабочага дня і праўленні калгасаў сочаць за строгім яго выкананнем. Цяглавая сіла скарыстоўваецца рацыянальна, рабочы дзень ушчыльнены да максімума».

Інфармацыя мае і крытычную накіраванасць. Старшыня сельсавета адзначыў, што калгасы незадаволены работай Горацкай МТС: «У 6 калгасах з 10 трактары яшчэ зусім не былі».

Добрыя навіны ў святочны дзень і ад жывёлаводаў раёна. Калгас «Совецкая Беларусь» Маслакоўскага сельсавета (старшыня Чэрняўскі) ужо выканаў 5-месячны план малакапаставак. Яшчэ чатыры гаспадаркі поўнасцю справіліся з заданнем чатырох месяцаў і паспяхова працавалі  ў маі.

«Уперадзе брыгада Тараса Ларковіча» – гэта заметка пра камсамольска-маладзёжную трактарную брыгаду Горацкай МТС. Калектыву даведзены план выпрацаваць 380 гектараў мяккага ворыва. На 5 мая на рахунку было ўжо 276,68 га.

«Выдатна працуюць трактарысты-камсамольцы Анатолій Бліндзераў і Нікалай Цімашкоў. Яны да 5 мая выпрацавалі на трактары «Інтэр» 124 гектары мяккага ворыва пры плане 97 га. У сучасны момант яны не зніжаюць тэмпаў работы… Прыбліжаюцца да выканання плана вясенняга ворыва трактарысты гэтай брыгады Віктар Ільянаў і Іван Грачыхін». Аўтар
В. Гур’еў падкрэсліў, што трактар працуе круглыя суткі.

У раёне, як і ва ўсёй краіне, востра стаяла праблема забяспечанасці насеннем. Галоўны аграном аддзела сельскай гаспадаркі І. Казута даў парады, як кожнай гаспадарцы атрымаць добры ўра­джай сельгаскультур для ўласных патрэб на спецыяльна адведзеных участках.

Раённая газета ў гэтым годзе выхо­дзіла тыражом 1000 экземпляраў. Друкавалася ў друкарні Беларускага сельскагаспадарчага інстытута.

Падрыхтавала
Тамара ДРАЗДОЎСКАЯ