14 студзеня ў Горацкім раённым гісторыка-этнаграфічным музеі адбылося тэатралізаванае прадстаўленне — “Каляды”. Традыцыі нашых продкаў набіраюць папулярнасць. Мы ўсе зараз добра ведаем, што падчас гэтага вясёлага старажытнага свята пераапранутыя калядоўшчыкі гуляюць па вуліцы, захо-дзяць у дамы, каб праспяваць гаспадарам прыпеўкі — абрадавыя песні з пажаданнямі моцнага здароўя, багацця і добрага ўраджаю. А гаспадары выносяць калядоўшчыкам пачастункі і таксама жадаюць усялякага дабрабыту.

Прыкладна па такім сцэнарыі праходзіла і свята ў музеі. Адрадзіць народныя абрады і традыцыі наважыліся ўдзельнікі народнага аб’яднання «Мастацтва», а гэта мастакі і майстры дэкаратыўна-прыкладного мастацтва, якія запрасілі да сябе на ўрачыстае паседжанне гасцей — з раённага Дома рамёстваў і калег з іншых устаноў культуры.

Так на свята завітаў калектыў калядоўшчыкаў з ДУА «Ленінская дзіцячая школа мастацтваў і мастацкіх рамёстваў» (дырэктар Таццяна Власава) і выхаванцы дзіцячай студыі батлеечных лялек «Дзіва» пад кіраўніцтвам Вольгі Сілівестравай (на здымку).

Усё было на гэтых «Калядах»: і цікавы расказ кіраўніка народнага аб’яднання «Мастацтва», старшага навуковага супрацоўніка музея Валянціны Белавусавай пра гісторыю свята, і вясёлыя вершы, і спевы калядоўшчыкаў, якія прыйшлі з Казой, Мядзведзем, і цікавыя тэатралізаваныя сцэнкі, і варажба.

Самыя цёплыя ўражанні засталіся ва ўдзельнікаў свята ад выступлення вядомай горацкай спявачкі Надзеі Курбасавай, якая выканала любімыя многімі песні. І сваім невялічкім канцэртам павіншавала з Калядамі прысутных: мясцовых паэтаў і пісьменнікаў, майстроў і мастакоў, усіх, хто завітаў на гэта цудоўнае мерапрыемства.

Фото Михаила ЛЕВЦОВА.