У Горацкім раённым гісторыка-этнаграфічным музеі быў прадстаўлены абрад “Валачобнікі” ў выкананні народнага фальклорнага ансамбля “Паршынскія зоры”. У Горацкім раёне яго адрадзілі ўдзельнікі гэтага калектыву.

На Светлай Сядміцы (тыдні пасля Вялікадня) звычайна праводзілі “валачобны абрад”. Мужчыны і жанчыны збіраліся групамі і хадзілі ад хаты да хаты з песнямі і віншаваннямі. Гучалі пажаданні моцнага здароўя, дабрабыту. За гэта гаспадары ўручалі гасцям падарункі: булкі, яйкі, сала і каўбасы. Валачобнікаў чакалі ў кожным доме, верылі, што ў іх словах ёсць нейкая нябачная сувязь з будучым. Лічылі, што хоць частка з прапетага гэтымі гасцямі павінна збыцца.

На мерапрыемстве прысутнічалі вучні сярэдніх школ №2 і №3 г. Горкі, студэнты БДСГА, члены народнага літаратурнага аб’яднання “Роднае слова”. Народныя песні і танцы, цікавыя гульні, карагоды не пакінулі абыякавымі аўдыторыю, і асабліва моладзь.

Да прысутных звярнуўся і настаяцель храма ў гонар іконы Божай Маці “Спарыцельніца хлябоў” іерэй Мікіта Храмянкоў, які расказаў пра свята Вялікадня са старажытных часоў  і сэнс яго ў нашым жыцці, а таксама пра неабходнасць духоўнага росту чалавека. У выкананні вучняў тэатральнага класа “Светлячок” Дзіцячай школы мастацтваў і вакальна-харавога майстэрства г. Горкі прагучалі вершы вядомай паэтэсы Ніны Кавалёвай “У Велікодную ноч” і “Вялікдзень”, а таксама Аляксандра Клачкова “Хрыстос Уваскрэсе!” у выкананні вядучай мерапрыемства Людмілы Дзеружковай. Свае вершы на велікодную тэматыку прадставіў Аляксандр Ведзянееў. Прыгожую духоўную песню падаравала прысутным і вядомая горацкая спявачка Надзея Курбасава.

Фота Міхаіла ЛЯЎЦОВА