Вучні горацкай гімназіі сустрэліся з таленавітай  зямлячкай, выкладчыкам БДСГА, членам літаратурнага аб’яднання “Роднае слова”, паэтэсай Алесяй Цэван.

Гутарку распачала Людміла Дзеружкова, кіраўнік народнага літаратурнага аб’яднання “Роднае слова”, якая пазнаёміла ўдзельнікаў гасцёўні з сучаснымі горацкімі паэтамі і пісьменнікамі, зборнікамі іх твораў.

Жыццё чалавека шматграннае, часам непрадказальнае, але заўсёды цікавае і непаўторнае. Але кожны чалавек пачынаецца з той мясціны, дзе ён нарадзіўся, зрабіў першыя крокі. Таму вершы Алесі Цэван аб Радзіме гучалі асабліва цёпла і светла.

Вучням было цікава пачуць успаміны аўтара пра яркія ўражанні з яе дзяцінства, разважанні пра тэндэнцыю сучаснай моладзі шукаць шчасця на чужых землях. Усхвалявала вучняў і пейзажная лірыка, бо, як адзначыла паэтэса, менавіта прырода – невычэрпная крыніца натхнення.

Ажыўленую гутарку ў вучняў выклікалі вершы Алесі Дзмітрыеўны пра каханне і сэнс жыцця. Удзельнікі гасцёўні таксама паспрабавалі сябе ў майстэрстве напісання вершаў. Шчырая гутарка з паэтэсай абудзіла ў падлеткаў цэлы букет эмоцый і пачуццяў, жаданне і далей запрашаць да сябе ў госці мастакоў слова.

Настаўнікі беларускай мовы і літаратуры Таццяна Конышава і Алена Шкуратава